USC-nin Stevens INI tədqiqatçıları siçanın hipokampında — yaddaş və öyrənmənin əsas bölgəsi olan CA1 hissəsində — əvvəllər bilinməyən dörd ayrı neyron qatı müəyyən ediblər. “Nature Communications” jurnalında dərc olunan araşdırma göstərir ki, bu qatlar unikal gen ifadəsi ilə fərqlənir və hipokampus boyunca nazik “zolaqlar” şəklində dəyişən struktura malikdir.
“Füyuzat” bu barədə “Nature Communications” jurnalında dərc olunan “USC Stevens Neuroimaging and Informatics Institute” tədqiqatına istinadən məlumat yayıb.
Bu tapıntı müxtəlif CA1 bölgələrinin niyə fərqli davranış funksiyalarını dəstəklədiyini və alzheimer, epilepsiya kimi xəstəliklərdə niyə bəzi hüceyrə tiplərinin daha həssas olduğunu izah etməyə kömək edir.
Tədqiqatçılar yüksək dəqiqlikli RNAscope görüntüləmə üsulu ilə 58 min hüceyrədən 330 minə yaxın RNA molekulunu analiz edərək CA1 üçün detallı hüceyrə atlası yaradıblar. Nəticələr CA1-in dörd ardıcıl hüceyrə qatından ibarət olduğunu və bu qatların 3D şəkildə bütöv təbəqələr yaratdığını göstərib.
Yeni atlas bütün alimlər üçün açıqdır və interaktiv 3D vizuallaşdırmalar Schol-AR tətbiqi vasitəsilə əldə edilə bilər. Müşahidə edilən bu quruluşun insan beynində də oxşar olması mümkün sayılır.
Tədqiqatçılar bildirirlər ki, növbəti addım bu qatların yaddaş, naviqasiya və emosiyalarla necə əlaqəli olduğunu və xəstəliklər zamanı necə zədələndiyini araşdırmaqdır.
