Gürcüstanda daimi və ya müvəqqəti yaşayan Azərbaycan Respublikası vətəndaşları üçün dövlət xidmətlərinə əlçatanlığı təmin etmək məqsədilə Səyyar ASAN xidmət qrupu Tbilisi şəhərinə səfər edəcək.
“Füyuzat” xəbər verir ki, bu barədə Azərbaycan Respublikasının Gürcüstandakı Səfirliyindən verilən məlumat yayıb.
Məlumata görə, 2026-cı ilin 5, 6 və 7 iyun tarixlərində vətəndaşlar səfirlik binasında operativ şəkildə müvafiq xidmətlərdən yararlana biləcəklər.
Göstəriləcək xidmətlər:
Səyyar xidmət çərçivəsində aşağıdakı sənədlərin rəsmiləşdirilməsi həyata keçiriləcək:
- Şəxsiyyət vəsiqələrinin verilməsi və ya müddəti bitmiş vəsiqələrin dəyişdirilməsi;
- Sürücülük vəsiqələrinin yenilənməsi;
- Məhkumluq barədə arayışların hazırlanması və təqdim edilməsi.
Müraciət və növbə qaydası:
Xidmətlərdən istifadə etmək istəyən vətəndaşlar üçün öncədən elektron növbə götürmək mütləqdir. Müraciət edənlər appointment.mfa.gov.az/az portalına daxil olaraq aşağıdakı ardıcıllığı izləməlidirlər:
- Portalda müvafiq Səfirliyi (Tbilisi) seçmək;
- Arzu olunan xidmət növünü müəyyən etmək;
- Səfər tarixlərindən birini (5, 6 və ya 7 iyun) qeyd etmək.
Ünvan: Tbilisi şəhəri, Vaxtanq Qorqasali küçəsi 4 (Azərbaycan Respublikasının Gürcüstandakı Səfirliyi).
Bu təşəbbüs xaricdə yaşayan vətəndaşlarımızın sənədləşmə işlərini asanlaşdırmaq və vaxt itkisinin qarşısını almaq məqsədi daşıyır.
