Dünyanın ən bahalı qidaları adətən təbiətin nadir verdiyi məhsullar, insan əlinin çox böyük zəhmət və xüsusi şəraitlə yaratdığı lüks qidalar hesab olunur və onların qiyməti bəzən adi insanların təsəvvür edə bilməyəcəyi qədər yüksək olur.
İlk yerlərdən birini tutan İran mənşəli “Almas kürüsü” xüsusi ilə seçilir və bu kürü beluga nərə balığından əldə olunur, nadirliyi və emal prosesinin incəliyi səbəbindən çox yüksək qiymətə satılır. Eyni zamanda Yaponiyanın Vaqyu və Kobe mal əti dünyanın ən bahalı ətlərindən sayılır, çünki bu heyvanlar xüsusi yemlərlə bəslənir, rahat şəraitdə saxlanılır və hətta əzələlərinin yumşaqlığı üçün xüsusi qulluq görürlər, nəticədə onların əti ağızda əriyən teksturaya malik olur.
Dünyanın ən qiymətli ədviyyatlarından biri olan zəfəran isə minlərlə çiçəkdən çox az miqdarda əldə edildiyi üçün qızıldan da baha qiymətə satıla bilir və həm yeməklərdə həm də dərman məqsədilə istifadə olunur. Fransanın və İtaliyanın bəzi bölgələrində tapılan ağ trüf göbələyi isə yer altında yetişdiyi və yalnız xüsusi itlər və ya donuzlar vasitəsilə tapıldığı üçün çox nadir sayılır və yüksək restoranlarda çox baha qiymətə təqdim olunur. Asiyada məşhur olan Kopi Luvak qəhvəsi isə civet adlı heyvanın həzm sistemindən keçdikdən sonra yığılan qəhvə dənələrindən hazırlandığı üçün qeyri-adi və eksklüziv bir içki hesab edilir. Yaponiyanın Matsutake göbələyi də həm çətin tapılması həm də xüsusi ətirinə görə çox bahalı qidalar sırasındadır.
Dünyanın bəzi lüks restoranlarında yeməklərin üzərinə hətta qızıl yarpaq və ya qızıl tozu əlavə olunur ki, bu da yalnız estetik görünüş üçün istifadə edilir və qiyməti daha da artırır. İspaniyanın İberiko jamonu xüsusi palamutla bəslənən donuzlardan hazırlanır və uzun müddət saxlanıldığı üçün çox qiymətli hesab edilir. Dəniz məhsulları arasında isə bluefin tuna balığı xüsusilə Yaponiyada çox baha qiymətə satılır və suşi mədəniyyətində elit qida sayılır. Bundan başqa quş yuvası şorbası Asiyada çox bahalı və sağlamlıq üçün faydalı hesab edilən xüsusi yeməklərdən biridir, çünki bu yuvalar müəyyən quş növlərinin tüpürcəyindən yaranır və yığılması çox çətindir. Dünyanın ən bahalı meyvələri arasında Yaponiyanın Yubari qovunu və Densuke qarpızı da yer alır və onlar mükəmməl yetişdirmə şəraiti və məhdud istehsal səbəbindən yüksək qiymətə satılır.
Hətta bəzi xüsusi pendirlər, məsələn nadir bölgələrdə hazırlanan fermentləşdirilmiş pendirlər də kolleksiya dəyərində hesab edilir. Bu cür qidaların hamısını birləşdirən əsas xüsusiyyət onların çox məhdud miqdarda istehsal olunması, xüsusi iqlim və şərait tələb etməsi, istehsal prosesinin uzun və çətin olması və nəticədə yalnız müəyyən elit təbəqənin əldə edə bilməsi ilə bağlıdır və buna görə də onlar dünyanın ən bahalı və ən prestijli qidaları siyahısında yer alır.
Hazırladı: Mədinə Məcidli
