Asiya İnfrastruktur İnvestisiya Bankı (AIIB) və Asiya İnkişaf Bankı (ADB) “Xəzər Yaşıl Enerji Dəhlizi” layihəsinin texniki-iqtisadi əsaslandırmasının (TİƏ) hazırlanmasına 2 milyon ABŞ dolları ayırmağı planlaşdırır.
“Füyuzat” xəbər verir ki, bu barədə AIIB məlumat verib.
Bildirilib ki, TİƏ-nin birinci mərhələsinə AIIB artıq 1 milyon ABŞ dolları dəyərində qrant ayırıb. Layihə çərçivəsində Azərbaycanla Qazaxıstan arasında uzunluğu 400 kilometr olan sualtı elektrik kabelinin çəkilməsi təklif olunur.
Özbəkistan isə dəhlizə quru elektrik şəbəkələri vasitəsilə qoşulacaq. Tədqiqat zamanı layihənin texniki, iqtisadi, maliyyə, ekoloji və sosial baxımdan nə dərəcədə həyata keçirilə biləcəyi qiymətləndiriləcək. Bundan əlavə, elektrik enerjisinin ötürülməsi variantları və transsərhəd ticarət imkanları öyrəniləcək.
