ABŞ-nin Nyu Orleans şəhərində bir cütlük bağçanı təmizləyərkən yarı torpağa basılmış bir mərmər daş tapdı. Üzərində latınca yazılar, o cümlədən “ölülərin ruhuna” ifadəsi var idi. Əvvəlcə bu, sırf dekorativ bir əşya kimi görünürdü, amma arxeloq Daniella Santoro əşyada qeyri-adi bir şey olduğunu hiss etmişdi.
“Füyuzat“ın məlumatına görə, bu barədə “Scienealert” məlumat yayıb.
Santoro və həyat yoldaşı Aaron Lopez bu latın yazısını araşdırmaq üçün mütəxəssislərə müraciət etdilər. Nəticədə, tapılan mərmər plitənin Roma qəbir daşının bir hissəsi olduğu müəyyən edildi. Yazıda Sextus Congenius Verus adlı bir Roma əsgərinin xatirəsi yad edilmişdi. Bu daş isə təxminən 1900 il əvvəl hazırlanmışdı.
Bu əşya əvvəllər İtaliyanın Çivitavekkiya şəhərindəki Milli Arxeologiya Muzeyində saxlanmışdı. Lakin II Dünya Müharibəsi dövründə muzey bombalanmış və bir çox eksponatlar itmişdi. Qəbir plitəsi də sonradan “itkin” hesabatına düşmüşdü.
Daşın İtaliyadan necə ABŞ-yə gəldiyi də maraqlı bir hekayədir: əvvəlki sahiblərdən biri II Dünya Müharibəsi zamanı İtaliyada xidmət etmiş bir əsgər idi və o bu daşı ailə yadigarı kimi ABŞ-yə gətirmişdi. Daha sonra daş bağçada süni dekor kimi qoyulmuşdu, sahibi isə onun tarixi əhəmiyyəti haqqında heç nə bilmirdi.
İndi FBI-nin Art Crime Team (İncəsənət Cinayətləri Qrupu) bu tapıntının yenidən İtaliyadakı muzeyə qaytarılması üçün işlər aparır.
