Şimali və Baltikyanı ölkələrin (Şimali Baltik Səkkizliyi ölkələri, NB8) xarici işlər nazirləri Şimali Atlantika Alyansının aktual məsələlərini, Ukraynaya dəstək və Rusiyanın xüsusi hərbi əməliyyatını müzakirə etmək niyyətindədirlər.
“Operativ Media” xəbər verir ki, bu barədə Finlandiya Xarici İşlər Nazirliyi məlumat yayıb.
Görüş aprelin 9-10-da Visbidə (İsveç) baş tutacaq. NB8 formatına Danimarka, İslandiya, Latviya, Litva, Norveç, Finlandiya, İsveç və Estoniya daxildir.
“Skandinaviya və Baltikyanı ölkələr bizim ən yaxın tərəfdaşlarımızdır. Xarici və təhlükəsizlik siyasətinin aktual məsələlərini mütəmadi olaraq müzakirə etməyimiz çox vacibdir”, – Finlandiyanın xarici işlər naziri Elina Valtonen bildirib.
İclasa hazırda 2024-cü ildə NB8 əməkdaşlığının əlaqələndirici ölkəsi olan İsveç sədrlik edəcək.
