Qazaxıstanın paytaxtı Astanada Türk Dövlətləri Təşkilatına (TDT) üzv ölkələrin Ədliyyə Nazirləri Şurasının ilk iclası keçirilib.
“Füyuzat”ın məlumatına görə, bu barədə “Anadolu Ajansı” məlumat yayıb.
Qazaxıstanın ədliyyə naziri Əzəmət Yeskarayevin ev sahibliyi etdiyi Müstəqillik Sarayında keçirilən görüşdə Türkiyə Respublikasının ədliyyə naziri Yılmaz Tunç, Azərbaycanın ədliyyə naziri Fərid Əhmədov, Qırğızıstanın ədliyyə naziri Ayaz Baetov, Özbəkistanın ədliyyə naziri Əkbər Taşkulov və TDT-nin baş katibi Kubanıçbek Ömurəliyev iştirak edib.
İclasın açılış nitqindən əvvəl Qazaxıstan naziri Yeskarayev Qazaxıstan Prezidenti Kasım-Comert Tokayevin TDT çərçivəsində ilk dəfə yaradılmış Ədliyyə Nazirləri Şurasının üzvlərinə göndərdiyi mesajı oxuyub.
Tokayev mesajında mənəvi, siyasi və dövlət təcrübəsinə əsaslanan hüquqi sistemə malik türk köçəri mədəniyyətinin varisləri olduqlarını bildirib və əlavə edib:
“Məqsədimiz xalqlar arasında etimad və qardaşlıq əsasında birliyimizi qorumaqdır”.
