Latviyanın müdafiə naziri Andris Spruds NATO hərbi komandanlığını müttəfiq qoşunların mövcudluğunu artırmağa və Baltik respublikasında hava məkanının mühafizəsini gücləndirməyə çağırıb.
“Füyuzat”ın məlumatına görə, bu barədə “Delfi” portalı yazır.
Qeyd edilib ki, Latviya müdafiə departamentinin rəhbəri NATO-nun Avropadakı Müttəfiq Qüvvələrinin baş komandanının müavini admiral Keyt Blount və NATO Hərbi Hava Qüvvələrinin komandanı general Ceyms Hekkerlə Rusiya ilə bağlı olduğu iddia edilən insidenti müzakirə edib. Spruds blokun hərbi rəhbərliyini hava hücumundan müdafiəni gücləndirməyə və müttəfiqlərin bu yay Vaşinqtonda keçirilən alyansın sammitində razılaşdığı NATO-nun rotasiya hava hücumundan müdafiə modelini tətbiq etməklə həm gücləndirilmiş çəkindirmə vasitələrini, həm də müttəfiqlərin Latviyada mövcudluğunu artırmağa çağırıb.
İyunun 14-də Latviyanın müdafiə naziri bildirib ki, NATO ölkələri rotasiya əsasında hava hücumundan müdafiə sistemlərinin və gələcəkdə qırıcı təyyarələrin daxil olacağı hava hücumundan müdafiə modelinin yaradılmasını müzakirə edir.
