Tariximizin qəhrəmanlıq hadisələrinin mədəniyyət və incəsənətdə təcəssümü xüsusi əhəmiyyətə malikdir. Məhz onların tərənnümü vasitəsilə baş verənlərin təkcə zahiri tərəfini deyil, həm də dərin mahiyyətini – insanların daxili həyəcanını, cəmiyyətin psixoloji vəziyyətini, səbəb və nəticələri göstərmək mümkündür. Mədəniyyət və incəsənət kadr arxasında qalanları görməyə, zamanın ab-havasını və xalqın emosional reaksiyasını çatdırmağa imkan verir.
“Füyuzat“ın AZƏRTAC-a istinadən məlumatına görə, bunu şair, yazıçı və Azərbaycan Yazıçılar Birliyinin yaradıcılıq məsələləri üzrə katibi İlqar Fəhmi müsahibədə deyib.
“Jurnalistika hadisələrin özünü xronoloji şəkildə təsvir edərkən, ədəbiyyat və incəsənət onların tarixi və psixoloji məqamlarını ortaya qoyur, təcrübənin geridə qoyduğu əhvali-ruhiyyəni çatdırır. Məhz buna görə də onlar hadisələrin daha dərin və daha əhatəli qavranılmasını təmin edir”, – deyə o vurğulayıb.
İlqar Fəhminin sözlərinə görə, digər xalqlarda olduğu kimi, Azərbaycan ədəbiyyatında və incəsənətində də qəhrəmanlıq və rəşadət mövzuları, mühüm tarixi mərhələlər mütləq şəkildə əks olunur.
“Bu, təbii olaraq baş verir, çünki yazıçılar, musiqiçilər və sənətçilər millətin bir hissəsidir. Onlar bu hadisələri öz ruhları vasitəsilə şərh edir, onları daxilən yaşayırlar. Buna görə də həmin mövzuları əks etdirməyə və populyarlaşdırmağa yönəlmiş hər hansı bir əsər yüksək tərifə layiqdir və daha geniş işıqlandırılmalıdır”, – deyə yazıçı qeyd edib.
