ABŞ Ermənistanın iqtisadi və siyasi dayanıqlığını gücləndirmək üçün ona 65 milyon dollardan çox yardım edəcək.
“Füyuzat”ın məlumatına görə, bu barədə ABŞ-ın dövlət katibi Antoni Blinken Brüsseldə Aİ, ABŞ və Ermənistanın üçtərəfli görüşündən əvvəl mətbuat konfransında bildirib.
“Birləşmiş Ştatlar Ermənistanın baş naziri Nikol Paşinyanın ölkəni idarə etmək və iqtisadi islahatlar aparmaq səylərinə sərmayə qoyur. Biz hökumət büdcəsindən 65 milyon dollardan çox vəsait ayırmağı planlaşdırırıq”, – o qeyd edib.
Dövlət katibi əlavə edib ki, bu, Vaşinqtonun iki il əvvəl İrəvana göstərdiyi yardımdan 50% çoxdur.
“Birləşmiş Ştatlar Ermənistana demokratik və iqtisadi dayanıqlığını gücləndirməyə kömək etmək niyyətindədir”, – Blinken qeyd edib. O, ABŞ-ın Cənubi Qafqazın gələcəyi ilə bağlı Ermənistanın mövqeyini bölüşdüyünü və onu “qonşuları ilə barışıq” olan “güclü, müstəqil güc” kimi görmək istədiyini vurğulayıb.
İrəvan bundan əvvəl Brüsseldəki danışıqların geosiyasi xarakter daşımadığını və başqa ölkələrə qarşı yönəlmədiyini iddia edib. Eyni zamanda, respublikada təmasların Ermənistanın Aİ və NATO ilə inteqrasiyaya doğru hərəkətini nəzərdə tutduğuna dair bəyanatlar səsləndirilib.
