Cenevrədə İran və “Avropa üçlüyü” ölkələri (Böyük Britaniya, Almaniya və Fransa) arasında danışıqların yeni mərhələsi başlayıb.
“Füyuzat”ın məlumatına görə, bu barədə İranın Xarici İşlər Nazirliyinin rəsmi nümayəndəsi İsmail Baqai məlumat verib.
“Bu gün Cenevrədə İran və üç Avropa ölkəsi arasında danışıqlar gedir. Danışıqlar bir sıra məsələlərə həsr olunub və sabah da davam edəcək. Biz heç vaxt danışıqları rədd etməmişik”, – diplomat həftəlik brifinqdə deyib. O qeyd edib ki, danışıqlar qarşılıqlı hörmətin göstərilməli olduğu və ümumi maraqların nəzərə alındığı ikitərəfli yoldur.
2024-cü il noyabrın 29-da İranın xarici işlər nazirlərinin müavinləri Məcid Təxt-Rəvançi və Kazım Qəribabadi Cenevrədə Böyük Britaniya, Almaniya və Fransa nümayəndələri ilə Tehranın nüvə proqramı məsələlərini müzakirə etmək üçün görüşüblər. “Farhikhtegan” qəzetinin məlumatına görə, Cenevrəyə səfər etməzdən əvvəl Təxt-Rəvançi Norveç tərəfinin təşəbbüsü ilə Osloya səfər edib və burada ABŞ-la gələcək danışıqların əsasını qoymaq üçün bir sıra görüşlər keçirib.
2015-ci ildə Tehranın nüvə proqramının inkişaf tempinin azaldılması müqabilində BMT Təhlükəsizlik Şurasının sanksiyaları da daxil olmaqla, ən sərt məhdudiyyətlərinin aradan qaldırılmasını nəzərdə tutan nüvə sazişi bağlanıb. 2018-ci ildə ABŞ-ın o zamankı prezidenti Donald Tramp öz qərarını məhdudiyyətlərin aradan qaldırılmasının İslam Respublikasına hərbi potensialını artırmağa və nüvə silahı yaratmağa imkan verəcəyi ilə izah edərək, sazişdən çıxıb. ABŞ-ın sazişdən çıxması Qərbin İrana qarşı sanksiyalarının (BMT sanksiyalarının yox) bərpasına gətirib çıxarıb. Sazişin tərəfləri olan Rusiya və Çin Vaşinqtonun qərarına qarşı çıxıblar.
