Google-ın tərkibində fəaliyyət göstərən DeepMind komandası tərəfindən hazırlanmış yeni süni intellekt sistemi riyaziyyat sahəsində diqqətçəkən uğura imza atıb. Məlumata görə, bu süni intellekt uzun illərdir alimlər tərəfindən həll olunmayan 13 mürəkkəb riyazi problemin həllinə nail olub. Söhbət xüsusilə kombinatorika və ədədlər nəzəriyyəsi kimi sahələrdə mövcud olan, riyaziyyatçılar üçün ciddi çətinlik yaradan məsələlərdən gedir.
“Füyuzat” “DonanımHaber” xəbər saytına istinad edərək məlumat verir.
Bu problemlərin bir hissəsi məşhur macar riyaziyyatçısı Paul Erdős tərəfindən irəli sürülən və “Erdős problemləri” kimi tanınan açıq suallardır. Süni intellekt bu problemləri analiz edərkən klassik hesablama üsullarından fərqli olaraq, müxtəlif ehtimal olunan həll yolları yaradır, onları məntiqi baxımdan yoxlayır və yalnız düzgün nəticə verən variantları saxlayır.
Araşdırma zamanı süni intellekt yüzlərlə açıq riyazi problemi təhlil edərək onlardan 13-ü üzrə inandırıcı həllər təqdim edib. Alimlərin fikrincə, bu həllərin bir neçəsi tamamilə yeni yanaşma hesab olunur və gələcək riyazi tədqiqatlar üçün mühüm əhəmiyyət daşıyır. Bununla belə, mütəxəssislər qeyd edirlər ki, süni intellektin təqdim etdiyi bütün nəticələr avtomatik olaraq qəti həll sayılmır və onlar mütləq riyaziyyatçılar tərəfindən yoxlanılmalıdır.
Bu nailiyyət süni intellektin təkcə gündəlik texnologiyalarda deyil, eyni zamanda fundamental elmdə də insanlara yardımçı ola biləcəyini göstərir. Mütəxəssislərə görə, gələcəkdə belə sistemlər riyaziyyatçıların yerini almaqdan daha çox, onlarla birlikdə çalışaraq yeni kəşflərin yolunu aça bilər.
