“Hizbullah hərəkatı yalnız İsrail tərəfindən müəyyən şərtlərin yerinə yetirilməsi və təcavüzdən zərər çəkmiş ərazilərin bərpası şərti ilə bölmələrinin tərksilah edilməsi məsələsini müzakirə etməyə razı olacaq”.
“Füyuzat”ın məlumatına görə, bunu “Müqavimətə Sadiqlik” fraksiyasından olan deputat Həsən Fədlallah deyib.
“Biz, ilk növbədə, son günlər şahidi olduğumuz Livana hücumlara son qoyulmasını tələb edirik”, – deyə siyasətçi “Asharq al-Awsat” qəzetinə bildirib.
“İkincisi, işğala son qoyulmalı və İsrail qoşunları Livan ərazisindən çıxmalıdır. Üçüncüsü, düşmən tərəfindən əsir götürülmüş bütün əsirlərimizin azad edilməsini gözləyirik”, – Fədlallah qeyd edib.
Hizbullah deputatı dördüncü şərtin hərbi əməliyyatlar zamanı maddi ziyan dəymiş yaşayış məntəqələrinin bərpası olduğunu bildirib: “Təcavüz zamanı dağılmış və zədələnmiş bütün evlər bərpa edilməlidir. Bütün bunlar edildikdən sonra biz Livanın müdafiə doktrinasını müzakirə etməyə başlaya bilərik”.
Aprelin 20-də respublika prezidenti general Cozef Aun Pasxa bayramı ilə bağlı müraciətində arzuolunmaz nəticələrə görə Hizbullahı tərksilah etməyə və ya ona təzyiq etməyə tələsmək fikrində olmadığını bildirib: “Biz bunu müdafiə doktrinasına dair dialoq çərçivəsində həyata keçirəcəyik, lakin şərait buna imkan verənə qədər gözləməliyik. Hazırda heç kim son tarixlərdən və ya təzyiqlərdən danışmır”.
