“Köpək” filmi 1994–cü ildə Azərbaycan kinosunun ən təsirli və düşündürücü əsərlərindən biri hesab olunur. Film Tofiq Tağızadə tərəfindən çəkilmişdir və cəmiyyətin acı reallıqlarını simvolik şəkildə əks etdirir. Filmdə əsas rollarda Yaşar Nuri, Məmməd Səfa, Rafiq Əzimov və Şahmar Ələkbərov kimi tanınmış sənətkarlar çıxış edir. Aktyorlar filmdə müxtəlif insan tiplərini canlandıraraq cəmiyyətdə mövcud olan ədalətsizlikləri və insanın düşdüyü ağır vəziyyətləri nümayiş etdirirlər.
İnsanın ağır həyat şəraitində necə dəyişməsi və bəzən öz insani keyfiyyətlərini itirməsi ilə bağlı filmin süjet xətti iş axtaran insanların aldadılaraq qul kimi işlədilməsi və onların alçaldıcı şəraitdə yaşamağa məcbur edilməsindən bəhs edir. Bu insanlar sözün əsl mənasında “köpəyə çevrilir”, yəni azadlıqlarını və ləyaqətlərini itirərək yalnız yaşamaq uğrunda mübarizə aparırlar.
Əsərdə göstərilir ki, insanlar bəzən bir parça çörək və ya yaşamaq naminə öz prinsiplərindən imtina edir, yaltaqlıq edir və başqalarına tabe olurlar. Bununla yanaşı, filmdə əsas qəhrəmanın mübarizəsi diqqət çəkir. O bu vəziyyətə tam təslim olmur və insan olaraq qalmağa çalışır. Bu isə filmin ən güclü ideyalarından biridir.
Qeyd edək ki, əvvəla, insan hansı vəziyyətə düşməsindən asılı olmayaraq öz ləyaqətini və insani dəyərlərini qorumağa çalışmalıdır. İkincisi, cəmiyyətdə mövcud olan ədalətsizliklər və insanların istismar olunması ciddi problemdir və buna qarşı mübarizə aparmaq lazımdır. Bundan əlavə, film göstərir ki, azadlıq insan üçün ən böyük dəyərlərdən biridir və onu itirmək insanın mənəvi məhv olması deməkdir.
Son olaraq, “Köpək” filmi sadəcə bir hekayə deyil, insanın cəmiyyət içində necə dəyişdiyini, necə sınandığını və bəzən necə məhv olduğunu göstərən dərin məna daşıyan əsərdir. Bu film izləyicini düşündürür, sarsıdır və insanlıq dəyərlərini yenidən qiymətləndirməyə vadar edir.
Hazırladı: Mədinə Məcidli
