Tehran Birgə Hərtərəfli Fəaliyyət Planında (JCPOA) nəzərdə tutulan şərtlərin yerinə yetirilməsi üzrə öhdəliklərini azaltmağa davam edir.
“Füyuzat”ın məlumatına görə, bunu İranın Atom Enerjisi Təşkilatının (AEOİ) rəhbəri Məhəmməd İslami bildirib.
“JCPOA-nın 36-cı maddəsi əsasında, tərəflərin öhdəlikləri yerinə yetirilmədiyi halda, İran öhdəlikləri azaltmaq hüququna malikdir”, – İslami qeyd edib. AEOİ-nin rəhbəri əlavə edib ki, burada tərəflərin yerinə yetirmədiyi öhdəliklər nəzərdə tutulur.
“Abş müqavilədən geri çəkilib, lakin eyni zamanda digər ölkələrin bizimlə əməkdaşlıq etməsinə imkan vermir”, – deyə o vurğulayıb.
BMT Təhlükəsizlik Şurasının daimi “beşliyi” və Almaniya tərəfindən nüvə inkişafı ətrafında yaranan böhranın öhdəsindən gəlmək məqsədilə 2015-ci ildə İranla Birgə Hərtərəfli Fəaliyyət Planı imzalanıb. ABŞ-ın əvvəlki prezidenti Donald Tramp 2018-ci ildə ölkəni müqavilədən çıxarmağa qərar verib. Amerikanın hazırkı lideri Co Bayden dəfələrlə Vaşinqtonı nüvə sazişinə qaytarmağa hazır olduğunu bildirib. Rusiya, Birləşmiş Krallıq, Almaniya, Çin, ABŞ və Fransa 2021-ci ilin aprelindən etibarən Vyanada İran tərəfi ilə JCPOA-nı öz ilkin formasında bərpa etmək üçün danışıqlar aparır. Bir neçə turdan sonra bu danışıqlar nəticəsiz başa çatıb.
