Yunanıstanın baş naziri Kyriakos Mitsotakis senator Jerar Moranın rəhbərlik etdiyi ABŞ Konqresinin nümayəndə heyəti ilə görüşüb. Görüşdə hərbi əməkdaşlıq, Yaxın Şərqdəki və Ukraynadakı vəziyyət müzakirə edilib.
“Füyuzat”ın məlumatına görə, bu barədə Yunanıstan hökumətinin başçısının mətbuat xidmətindən bildirilib.
Bəyanatda qeyd edilir ki, Yunanıstan və ABŞ arasında strateji münasibətlər, müdafiə sahəsində Yunan-Amerika əməkdaşlığı və regional sabitlik və təhlükəsizliyin sütunu kimi Yunanıstanın rolu müzakirə olunub. Həmçinin regional və beynəlxalq maraq doğuran məsələlərə də toxunulub.
Qeyd edək ki, 2019-cu ilin oktyabrında Yunanıstan və ABŞ qarşılıqlı müdafiə sahəsində əməkdaşlıq haqqında sazişə düzəlişlər edib. Saziş 1990-cı ildə imzalanıb. Sənəd ABŞ-ın Krit adasındakı hərbi-dəniz bazasının genişləndirilməsini, Larissa şəhəri yaxınlığındakı hava bazasının, Stefanovikio (Maqneziya bölgəsi) aviasiya bazasının və Yunanıstanın şimal-şərqindəki Aleksandropolis limanının istifadəsini nəzərdə tutur. Həmçinin Yunanıstan razılığı ilə onun ərazisində istənilən digər hərbi obyektdən istifadə edilməsinə icazə verir.
