Amerikan yazıçısı Den Braun tərəfindən yazılmış “Da Vinçi Şifrəsi” əsəri 2003-cü ildə nəşr olunduqdan sonra dünya miqyasında böyük maraq doğurmuş, lakin eyni zamanda ciddi mübahisələrə səbəb olmuşdur. Əsər bəzi ölkələrdə qadağan olunmuşdur. Buna səbəb isə yazıçının dini, mədəni və ictimai həsasslıqla bağlı toxunduğu bəzi mövzulardır.
Əsərin süjeti, əsasən, xristianlıq tarixi, xüsusilə də İsa Məsih və Mariya Maqdalena haqqında alternativ və qeyri-ənənəvi iddialar üzərində qurulub. Romanda irəli sürülən fikirlərə görə, İsa Məsih ilahi deyil, adi insan olmuş və onun Mariya Maqdalena ilə ailə həyatı qurduğu iddia edilir. Bu yanaşma ənənəvi xristian inancına zidd olduğu üçün bir çox dini qurumlar və icmalar tərəfindən ciddi tənqid edilmişdir.
Məhz bu səbəbdən bəzi ölkələrdə kitabın yayımı məhdudlaşdırılmış və ya tamamilə qadağan edilmişdir. Məsələn, Livan və İran kimi ölkələrdə əsər dini dəyərlərə zidd hesab olunaraq rəsmi şəkildə qadağan olunmuşdur. Hindistan və Pakistan kimi bəzi ölkələrdə isə kitabın yayımı müvəqqəti olaraq dayandırılmış və ya müəyyən şərtlərlə icazə verilmişdir. Bu qərarlar, əsasən, ictimai narazılığın və dini qrupların etirazlarının qarşısını almaq məqsədi daşıyırdı.
Digər mühüm səbəb isə əsərin tarixi faktlarla bədii uydurmaları qarışdırmasıdır. Bir çox oxucu və dini liderlər hesab edirdi ki, kitabda təqdim olunan məlumatlar bəzi insanlar tərəfindən həqiqət kimi qəbul edilə bilər və bu da yanlış təsəvvürlərin formalaşmasına gətirib çıxarar. Xüsusilə dini mövzularda bu cür yanaşma bəzi cəmiyyətlərdə təhlükəli hesab olunur.
“Da Vinçi Şifrəsi”nin qadağan olunması onun ədəbi keyfiyyətindən deyil, daha çox toxunduğu həssas mövzulardan qaynaqlanır. Buna baxmayaraq əsər dünya ədəbiyyatında mühüm yer tutmağa davam edir və geniş oxucu kütləsi tərəfindən maraqla qarşılanır.
