“Ermənistan yaxın vaxtlarda Azərbaycanla sülh müqaviləsinin bağlanmasını mümkün hesab edir. Ermənistan Baş naziri Nikol Paşinyan və Azərbaycan Prezidenti İlham Əliyev administrasiyalarının birgə bəyanatı buna müsbət zəmin yaradır“.
“Füyuzat”ın məlumatına görə, bu fikirləri Ermənistan parlamentinin xarici əlaqələr komissiyasının rəhbəri Sarqis Xandanyan keçirdiyi brifinqdə səsləndirib.
“Biz həmişə sülh müqaviləsinin imzalanacağını ehtimal edirik, çünki biz konstruktivik, lakin sənəd Ermənistanın onu imzalamağı mümkün hesab etdiyi və Azərbaycanın razılıq verəcəyi formada olmalıdır. Qeyd edək ki, sözügedən bəyanatın qəbulu prosesə müsbət təsir göstərə bilər, çünki bəyanatın mətnində ən azı müsbət dil var ki, bu da gələcək danışıqların daha rahat gedişatına kömək edə bilər”, – deyə qanunverici qeyd edib.
Xandanyan Ermənistan və Azərbaycan xarici işlər nazirləri arasında Vaşinqtonda mümkün danışıqlara da toxunub, İrəvanın bu görüşə razılıq verdiyini qeyd edib və ümid edib ki, amerikalı tərəfdaşlar ABŞ-da danışıqları davam etdirmək üçün Bakıya kifayət qədər səy və təzyiq göstərəcəklər: ”XİN rəhbərlərinin Moskvada mümkün görüşünə gəlincə, orada danışıqların aparılması ilə bağlı dəqiq təkliflər olmayıb, lakin danışıqların davamlılığını təmin etmək çox vacibdir. Məntiq formalaşıb ki, Vaşinqtonda xarici işlər nazirləri və Brüsseldə dövlət başçıları səviyyəsində görüşlər keçirilsin. Bu məntiq davam etsəydi, çox yaxşı olardı”.
Parlament komissiyasının rəhbəri həmçinin ümidvar olduğunu bildirib ki, Azərbaycan hakimiyyətinin növbədənkənar prezident seçkiləri ilə bağlı qərarı “danışıqların ləngiməsi üçün süni səbəb olmayacaq”.
Qeyd edək ki, cümə axşamı Ermənistanın baş nazirinin ofisi və Azərbaycan prezidentinin administrasiyası birgə bəyanat yayıb və bəyan edilib ki, Yerevan və Bakı münasibətləri tənzimləmək və suverenlik və ərazi bütövlüyü prinsiplərinə hörmət əsasında sülh müqaviləsi bağlamaq niyyətlərini təsdiqləyirlər. Azərbaycan xoşməramlılıq əlaməti olaraq 32 erməni, Ermənistan isə 2 azərbaycanlı hərbçini azad edib.
