Bu gün tarix üzrə fəlsəfə doktoru, “Füyuzat” jurnalının yazarı Mahir Qəribovun 50 yaşı tamam olur. Azərbaycanın elmi və publisistik mühitində fəal iştirak edən Mahir Qəribov uzun illərdir milli tariximizin öyrənilməsi, tədqiqi və ictimaiyyətə çatdırılması istiqamətində faydalı fəaliyyət göstərir.
Tariximizin az öyrənilmiş sahələrinin araşdırılmasına xüsusi diqqət yetirən Mahir Qəribov Azərbaycan Xalq Cümhuriyyəti dövrü, 1918–1920-ci illər hadisələri, Ermənistan–Azərbaycan münaqişələrinin tarixi aspektləri, eləcə də Cənubi Qafqazda geosiyasi dəyişikliklər kimi mövzulara dair elmi araşdırmaları ilə tanınır. Onun müəllifi olduğu məqalələr, sənədli materiallar və publisistik yazılar müxtəlif media resurslarında dərc olunaraq geniş oxucu auditoriyası tərəfindən maraqla qarşılanır.
Qeyd edək ki, Mahir Qəribov bu illər ərzində yalnız araşdırmalar aparmaqla kifayətlənməyib, həm də bu bilikləri daha geniş kütləyə çatdırmaq üçün aktiv ictimai fəaliyyət göstərib. O, bir sıra tarixi sənədli filmlərin elmi məsləhətçisi və ya ssenari müəllifi kimi çıxış edib, eyni zamanda “Füyuzat” jurnalında tarix, ədəbiyyat və milli-mənəvi dəyərlərlə bağlı müntəzəm yazılarla çıxış edib.
Onun bu sahədəki xidmətləri ictimai səviyyədə də qiymətləndirilib. Belə ki, Mahir Qəribov Azərbaycan tarixinin araşdırılmasına verdiyi töhfələrə görə mükafatlandırılıb.
MİMTA Fondunun kollektivi adından dəyərli alimimizi 50 illik yubileyi münasibətilə təbrik edir, ona yeni elmi uğurlar, cansağlığı və məhsuldar yaradıcılıq yolu arzulayırıq.
