Bakı Funikulyoru Azərbaycanın paytaxtı Bakı şəhərində yerləşən həm nəqliyyat vasitəsi, həm də turistik obyekt kimi xidmət göstərən mühüm infrastruktur layihəsidir.
İlk dəfə 1960-cı il mayın 5-də istifadəyə verilmiş funikulyor Bakı sakinlərinin və turistlərin sevimli nəqliyyat növlərindən birinə çevrilmişdir. Nəqliyyat vasitəsi 2001 və 2007-ci illərdə iki dəfə əsaslı şəkildə təmir olunaraq müasir standartlara uyğunlaşdırılmışdır.
Prezident İlham Əliyevin göstərişinə əsasən, 2012-ci ildə Bakı Funikulyorunda əsaslı təmir-yenidənqurma işləri aparılmış və 2012-ci ilin mayında yenidən sərnişinlərin ixtiyarına verilmişdir.
Funikulyor iki stansiyadan ibarətdir: dəniz səviyyəsinə yaxın “Bəhram Gur” və yüksək nöqtədə yerləşən “Şəhidlər Xiyabanı”. Bu iki nöqtə arasında təxminən 455 metrlik məsafə qət olunur və səyahət 4 dəqiqəyə yaxın vaxt alır. Vaqonlararası hərəkət intervalı isə orta hesabla 10 dəqiqə təşkil edir.
2020-ci ilin mart ayında pandemiya səbəbilə fəaliyyətini dayandıran Bakı Funikulyoru 2021-ci ilin dekabrında yenidən istifadəyə verilmişdir. Bu müddət ərzində təhlükəsizlik və texniki baxımdan yenilənmə işləri aparılmışdır.
Hazırda funikulyorda gediş haqqı 1 manat olaraq müəyyənləşdirilib. Bununla belə, bəzi əlamətdar günlərdə funikulyordan istifadə pulsuz şəkildə həyata keçirilir.
Bakı Funikulyoru təkcə şəhər nəqliyyatına dəstək vermir, eyni zamanda turistlərin xüsusi marağına səbəb olur. Yuxarı stansiyadan görünən şəhər panoraması, Xəzər dənizinin mənzərəsi turistlərin və foto həvəskarlarını cəlb edir.
Avropa səviyyəsində də qiymətləndirilən bu funikulyor 2020-ci ildə qitənin ən yaxşı funikulyorları arasında ilk beşliyə daxil olmuşdur. Bu da onun beynəlxalq nüfuzunun və texniki səviyyəsinin yüksək olduğunu bir daha göstərir.
Bakı Funikulyoru həm keçmişin izlərini, həm də müasirliyin nəfəsini özündə birləşdirən nadir şəhər nəqliyyat növlərindən biridir.
Ləman Vahid
