Türkiyənin Dövlət Opera və Balet Baş İdarəsi tərəfindən sentyabrın 12–dən 26-dək keçiriləcək 33-cü Beynəlxalq Aspendos Opera və Balet Festivalı bu il də zəngin proqramı ilə sənətsevərlərin görüşünə gələcək.
“Füyuzat” AZƏRTAC-a istinadən xəbər verir ki, Türkiyənin Antalya vilayətində yerləşən “Aspendos” Antik Teatrında təşkil olunacaq festivalda Abay adına Qazaxıstan Milli Opera və Balet Teatrının sənətçiləri də yer alacaqlar. Proqram çərçivəsində 1 opera, 2 balet və 1 səhnə kantatası olmaqla ümumilikdə 4 əsər 6 dəfə nümayiş etdiriləcək.
Festivalın açılışı Antalya Dövlət Opera və Balet Teatrı tərəfindən Cüzeppe Verdinin “Attila” operasının nümayişi ilə baş tutacaq. Yiğit Günsoyun quruluş verdiyi tamaşada Attila obrazını Şafak Güç canlandıracaq. Lorenzo Kastriotanın dirijorluğu ilə Antalya Dövlət Opera və Balet Orkestri, Mahir Seyrekin rəhbərliyi ilə isə teatrın xoru tamaşanı müşayiət edəcək.
Festivalın davamında Lev Tolstoyun ölməz romanı əsasında hazırlanan “Anna Karenina” baleti müasir yozumda təqdim ediləcək. Pyotr Çaykovski, Cakomo Puççini və Sergey Prokofyevin əsərlərindən ibarət musiqi aranjimanı və dirijorluğu Tulio Qalyardo Varasa, xoreoqrafiyası isə cənubi koreyalı xoreoqraf Yanq Sun Huya (Young Soon Hue) məxsus olan səhnə əsəri neoklassik üslubda sənətsevərlərin ixtiyarına veriləcək.
Sentyabrın 19-da və 21-də Aspendos Antik Teatrında Antalya Dövlət Opera və Baleti tərəfindən Karl Orfun dünyaşöhrətli “Carmina Burana” səhnə kantatası nümayiş olunacaq.
Volkan Ersoyun səhnələşdirdiyi əsərin xoreoqrafiyası A.Volkan Ersoy, G.Armağan Davran, Dəniz Özaydın, Alper Marangoz, Fərhad Güneş, Özgür Adam İnanç, Kürşat Kılıç, Yağızhan Danış və Didem Ertana məxsusdur. Tamaşada orkestr, solistlər, xor, uşaq xoru, balet və müasir rəqs qruplarının sintezindən ibarət yeni və möhtəşəm xoreoqrafik həll təqdim ediləcək.
Festival Abay adına Qazaxıstan Milli Akademik Opera və Balet Teatrı tərəfindən tarixin ən məşhur qladiatoruna həsr olunmuş “Spartak” baletinin nümayişi ilə yekunlaşacaq. 1934-cü ildə təsis edilən və Qazaxıstanın aparıcı sənət ocaqlarından biri hesab olunan teatr zəngin repertuarı və beynəlxalq layihələrdəki uğurlu çıxışları ilə seçilir.
