Qlobal konsolidasiya edilmiş dövlət borcu 2023-cü ildə 100 trilyon dolları ötüb və dünya iqtisadiyyatından daha sürətlə böyüyür.
“Füyuzat”ın məlumatına görə, bu barədə Dünya Bankı və Beynəlxalq Valyuta Fondu məlumat yayıb.
Hesablamalara 2023-cü ilin ortalarına olan ÜDM hesabatlarını dərc edən 178 iqtisadiyyatın məlumatları daxildir. Konsolidə edilmiş dövlət borcu rəqəminə mərkəzi hökumətin, regionların və bələdiyyələrin borcları daxildir.
Qlobal dövlət borcu 2023-cü ildə 5,8% artaraq 101 trilyon dollara çatıb, qlobal ÜDM isə daha yavaş sürətlə 4,2% artaraq 105,4 trilyon dollar təşkil edib.
Ən çox borcu olan dövlət isə ABŞ olub. Onun borcu 37,5 trilyon dollara çatıb. Bu, qlobal iqtisadiyyatın ümumi borcunun 35,6%-ni təşkil edib. Çin 14,9 trilyon dollar və ya qlobal ÜDM-in 14,1%-i ilə ikinci yerdədir. İki ölkənin dövlət borcu keçən il müvafiq olaraq 6% və 8% artıb.
Yaponiya 2023-cü ildə dövlət borcu 3% azalaraq 10,6 trilyon dollara çatmaqla üçüncü yeri tutub. Eyni zamanda, Yaponiya borcunun qlobal ÜDM-dəki payı illik müqayisədə 10,8%-dən 10,1%-ə düşüb.
Böyük Britaniya, Fransa, İtaliya, Hindistan, Almaniya, Kanada, Braziliya və İspaniya ötən il dövlət borcu dünya iqtisadiyyatının 1%-ni ötmüş ölkələr sırasında olub. Rusiya 2023-cü ildə borclarını 12% azaldaraq, 321,3 milyard dollara qədər dövlət borcu ilə 28-ci yerdə qərarlaşıb və dünya iqtisadiyyatının 0,3%-ni təşkil edib.
