Finlandiya hökumətinin başçısı Petteri Orpo Böyük Britaniyanın baş naziri Rişi Sunakı telefonla respublikanın Rusiya ilə sərhədindəki vəziyyət barədə məlumatlandırıb.
“Füyuzat”ın məlumatına görə, bu barədə Finlandiya hökumətinin Hökumət Kommunikasiyaları Departamenti məlumat yayıb.
“Baş nazirlər Ukraynaya fəal dəstəyin davam etdirilməsi yollarını müzakirə ediblər. İyulda Böyük Britaniyanın ev sahibliyi edəcəyi Avropa Siyasi Birliyinin dördüncü iclası da gündəmdə olub. Baş nazir Orpo Finlandiyanın şərqindəki vəziyyətlə bağlı baş nazir Sunakı məlumatlandırıb”, – bəyanatda deyilir.
Qeyd edək ki, iyulun 18-də Böyük Britaniyada Avropa Siyasi Birliyinin (EPC) dördüncü sammiti keçiriləcək.
Böyük Britaniyanın baş nazirinin ofisindən verilən açıqlamaya görə, 50-yə yaxın Avropa ölkəsinin liderləri Ukraynadakı münaqişə və qeyri-qanuni miqrasiya ilə mübarizə də daxil olmaqla, ümumi aktual məsələləri müzakirə etmək üçün bir araya gələcəklər. Tədbir Böyük Britaniyanın keçmiş baş naziri Uinston Çörçilin 1874-cü ildə anadan olduğu Blenheim sarayında baş tutacaq.
EPC 2022-ci ildə Fransa prezidenti Emmanuel Makronun təşəbbüsü ilə Avropa İttifaqı tərəfindən yaradılıb. Bu platforma qitə boyu Avropa ölkələrinin siyasi koordinasiyası və Kiyev və Kişinyov da daxil olmaqla Aİ-dən kənar tərəfdaşlarla daha sıx dialoq üçün nəzərdə tutulub.
