İranın strateji məsələlər üzrə vitse-prezidenti Məhəmməd Cavad Zərif İslam Respublikasının məhkəmə sisteminin rəhbəri Qulamhüseyn Möhseni-Ejei ilə görüşdən sonra istefa vermək qərarına gəldiyini bildirib.
“Füyuzat”ın məlumatına görə, o bu barədə “X” sosial şəbəkəsindəki səhifəsində yazıb.
“Dünən çox hörmətli ədliyyə orqanının rəhbəri məni görüşə dəvət etdi. Ölkədəki mövcud vəziyyəti qeyd edərək, hökumətə daha da təzyiq göstərməmək üçün mənə universitetə qayıtmağı (müəllimlik etməyi – red.) tövsiyə etdi”, – Zərif qeyd edib.
“Mən Prezident Məsud Pezeşkianı dəstəkləməkdən qürur duyuram və ona və xalqa xidmətində ən yaxşı uğurları arzulayıram”, – o əlavə edib.
Zərif son 6 ayda ona qarşı təhqir, böhtan və təhdidlərlə üzləşdiyini, lakin ölkəsinə xidmət etməkdə israrlı olduğunu bildirib.
Bazar günü axşam “Fars” xəbər agentliyi mənbələrə istinadən xəbər verib ki, İranın strateji məsələlər üzrə vitse-prezidenti istefa verib, lakin onun xahişi hələ də prezident tərəfindən qəbul edilməyib. İran mediası uzun müddətdir ki, Zərifin övladlarının ABŞ vətəndaşı olduğu iddiası ilə onun vəzifəsini qanunsuz hesab edirdi.
Bu addım ilə İranın hazırkı hökumətinin formalaşmasından sonra ikinci dəfədir ki, Məhəmməd Cavad Zərif tutduğu vəzifədən istefa verməyə cəhd edir. O, istefa ərizəsini prezidentə ilk olaraq avqustun 11-də, cəmi on gün vəzifədə qaldıqdan sonra təqdim edib. Həmin vaxt prezident onun ərizəsini qəbul etməyib və onu vəzifədə qalmağa razı salıb.
