Bir neçə gün öncə Rusiyanın İrkutsk şəhərində yerləşən Sibir və Uzaq Şərq Taun Əleyhinə Elmi-Tədqiqat İnstitutunun 28 yaşlı əməkdaşı Darya Şipilovanın ölümü mümkün taun yoluxması ilə bağlı dünya alimləri arasında müzakirələrə səbəb olub.
Belə ki, Şipilova oktyabrın 2-də səbəbi bəlli olmayan pnevmoniyadan vəfat edib. Sosial şəbəkələrdə onun laboratoriyada taun bakteriyası olan sınaq şüşəsini sındırdıqdan sonra yoluxduğu barədə iddialar yayılsa da, bu məlumat təsdiqlənməyib. “Füyuzat” bu barədə “ScienceAlert” ə istinadən məlumat verir.
Rusiyanın səhiyyə və istehlakçı hüquqlarına nəzarət qurumu əməkdaşın ölümünün institutda tədqiq edilən patogenlərlə əlaqəsinin müəyyən edilmədiyini bildirib. Təxminən 200 nəfər ehtiyat tədbiri olaraq tibbi müşahidəyə götürülüb və oktyabrın 6-na olan məlumata görə, onlarla təmasda olan şəxslər arasında taun aşkarlanmayıb.
Ümumdünya Səhiyyə Təşkilatına görə xəstəlik erkən mərhələdə aşkarlanarsa, antibiotiklərlə effektiv şəkildə müalicə oluna bilər. Birmingem Universitetinin virus immunologiyası üzrə dosenti Zania Stamataki yüksək təhlükəsizliyə sahib laboratoriyada sınaq şüşəsinin sınmasının avtomatik olaraq yoluxma demək olmadığını vurğulayıb. Belə laboratoriyalarda bioloji təhlükəsizlik kabinetləri, filtrasiya, mənfi hava təzyiqi və qoruyucu vasitələr daxil olmaqla bir neçə təhlükəsizlik sistemi eyni vaxtda tətbiq edilir.
Hazırda Şipilovanın taundan öldüyünə dair təsdiqlənmiş sübut yoxdur. Mütəxəssislər bunun müəyyənləşdirilməsi üçün xəstədən götürülmüş nümunələrin və laboratoriyada saxlanılan bakteriya ştammlarının genetik müqayisəsinin vacib olduğunu bildirirlər.
