Elə sözlər var ki, onları bircə cümlə ilə izah etmək mümkün deyil. “Müəllim” də belə sözlərdəndir. Bu adın hər hərfində böyük bir məsuliyyət, səssiz bir fədakarlıq, sonsuz səbir və insan yetişdirməyin müqəddəs yükü var.
Müəllim sinfə yalnız kitab və biliklə daxil olmur. O, bir uşağın dünyasına daxil olur. Bəzən dediyi bir cümlə illər sonra xatırlanır, verdiyi bir tapşırıq insanın yolunu dəyişir, göstərdiyi inam isə uşağın özünə olan inamına çevrilir. Çünki müəllim bəzən fərqinə varmadan bir gələcəyin təməlini qoyur.
Mən bunu öz həyatımda yaşamışam.
5-ci sinifdə oxuyarkən Azərbaycan dili fənnini mənə sevdirən bir müəllimim oldu. O, mənə sadəcə qaydaları, sözləri, cümlələri öyrətmədi. Azərbaycan dilinin arxasında bütöv bir dünya olduğunu göstərdi. Dərslər onun üçün yalnız mövzunu izah edib sinifdən çıxmaq deyildi. O, sözə sevgi aşılamağı bacarırdı. Mən də zaman keçdikcə həmin sevgini öz içimdə böyütdüm.
Bir gün başa düşdüm ki, mən də onun getdiyi yolla getmək istəyirəm. Bəlkə müəllim olmadım, amma o dərslərin məndə oyatdığı hiss başqa bir şəkildə özünü göstərdi. Bu gün bir neçə Azərbaycan dili kitabının müəllifiyəm. Yazdığım hər səhifədə, izah etdiyim hər qaydada, uşaqlar üçün hazırladığım hər tapşırıqda o illərin bir izi var.
İnsan bəzən həyatında hansı qapını kimin açdığını illər sonra anlayır. Mənim üçün həmin qapılardan birini 5-ci sinifdə Azərbaycan dili müəllimim açmışdı.
Bu gün onun qarşısında dayanıb “Siz mənim həyatımı dəyişdiniz” demək bəlkə də çox böyük bir cümlədir. Amma mən bilirəm ki, yazdığım hər kitab, yaratdığım hər tədris materialı onun mənə illər əvvəl verdiyi o ilk sevgiyə bir cavabdır.
Müəllim olmaq bəlkə də bir insanın həyatına toxunmağın ən səssiz, amma ən uzunömürlü formasıdır. Çünki müəllim dərsdən sonra sinifdən çıxır, amma öyrətdikləri şagirdin həyatından heç vaxt çıxmır.
Bəzən bir müəllim bir uşağın qarşısına sadəcə müəllim kimi çıxır. İllər sonra isə həmin uşağın həyat hekayəsində ən gözəl başlanğıclardan birinə çevrilir.
Mənim müəllimim də mənim üçün belə bir başlanğıc oldu.
Müəllif: Hürzət Təhməzli
