Koreya Respublikasının Müdafiə Vasitələrinin Alınması Proqramı İdarəsi (DAPA) terrorla mübarizə əməliyyatları üçün dördayaqlı robotun hazırlanmasını başa çatdırıb və robotu sınaqdan keçirməyə başlayır.
“Füyuzat”ın məlumatına görə, bu barədə DAPA məlumat yayıb.
Məlumata görə, qarşıdakı altı ay ərzində hərbçilər robot itin effektivliyini qiymətləndirəcək, bundan sonra onun istifadəsi ilə bağlı yekun qərar qəbul edəcəklər. Həmçinin qeyd olunub ki, “Hyundai Rotem” və “Rainbow Robotics”in iştirak etdiyi prototipin hazırlanması cəmi iki il çəkib.
“Robot it 4 km/saatdan çox sürətlə hərəkət edir, hündürlüyü 20 sm-dən çox olan şaquli maneələri dəf edə bilir, həmçinin müşahidə və kəşfiyyat üçün gündüz və gecə görmə kameraları ilə təchiz olunub. Döyüş tapşırıqlarını yerinə yetirmək üçün robot uzaqdan idarə olunan odlu silahlarla da təchiz oluna bilər”, – məlumatda bildirilib.
Həmçinin qeyd olunub ki, onun əsas funksiyaları şəxsi heyəti cəlb etməzdən əvvəl binalarda terror təhlükələrini müəyyən etmək, öldürücü və qeyri-öldürücü silahlardan istifadə etmək qabiliyyətinə malik potensial terrorçuların hərəkətlərinə cavab vermək olacaq.
Robot itlər və ya dördayaqlılar da adlandırılan robotlar bütün dünya ordularında, polislərdə və xilasetmə xidmətlərində fəal şəkildə tətbiq edilir.
