“Məncə, saziş və bəyannamənin İran və Rusiya üçün çox ciddi faydaları var. Bu saziş həyata keçirildikdə İran dəmir yolu ilə Fars körfəzindən Qara dənizə çıxış əldə edəcək. Rusiya və İran iki ölkə arasında dəmir yolu əlaqəsi yarada biləcək”.
“Füyuzat”ın məlumatına görə, bunu Ermənistanın Baş naziri Nikol Paşinyan avqustun 8-də Vaşinqtonda imzalanan və paraflanan sənədlərlə bağlı “Fox News” telekanalına müsahibəsində deyib.
“Demək istədiyim odur ki, əgər biz bu sazişin iqtisadi tərəfinə diqqət yetirsək, o zaman təkcə Ermənistan, Azərbaycan, ABŞ və Türkiyə deyil, həm də Rusiya və İran çox mühüm və həqiqətən hiss olunan, faktiki olaraq görünməmiş faydalar əldə edəcək. İndi Cənubi Qafqazdan İranı Rusiya ilə birləşdirən dəmir yolu yoxdur. Ona görə də mən bunu beynəlxalq sabitlik və təhlükəsizlik çərçivəsində bütün ölkələrə, o cümlədən, bütün beynəlxalq ictimaiyyətə əhəmiyyətli faydalar gətirə biləcək çox mühüm saziş hesab edirəm.
Artıq qeyd etdim ki, bizim sülh yollarının kəsişməsi adlı layihəmiz var və həqiqətən də bu saziş əməkdaşlığın qovşağına çevrilə bilər və bizim məqsədimiz məhz elə budur”, – Paşinyan əlavə edib.
