İsrailin müdafiə naziri Yoav Qallant amerikalı həmkarı Lloyd Ostin ilə İran və onun tərəfindən çıxış edən silahlıların mümkün hücumu fonunda “əməliyyat və strateji koordinasiya”nı, eləcə də iki ölkənin silahlı qüvvələrinin “qarşılıqlı işləmə qabiliyyətini” müzakirə edib.
“Füyuzat”ın məlumatına görə, bu barədə İsrail Müdafiə Nazirliyinin mətbuat xidməti məlumat yayıb.
“Qallant Ostin ilə son hadisələr fonunda əməliyyat və strateji koordinasiyanı, həmçinin ABŞ-ın regionda yerləşdirdiyi geniş hərbi imkanları nəzərə alaraq İsrail və ABŞ qüvvələrinin qarşılıqlı işləmə qabiliyyətini müzakirə edib. İsrail Müdafiə Nazirliyinin rəhbəri həmçinin Pentaqon rəhbərini İsrail Müdafiə Qüvvələrinin İran və onun regional tərəfdaşlarının təhdidləri qarşısında hazırlığı və imkanları barədə məlumatlandırıb. Bundan əlavə, Qallant Qəzza zolağında radikallar tərəfindən saxlanılan girovların azad edilməsi ilə bağlı razılığın əldə edilməsinin vacibliyini vurğulayıb”, – departament əlavə edib.
Bu, HƏMAS hərəkatının Siyasi Bürosunun rəhbəri İsmayıl Haniyənin Tehranda ölümündən sonra iki nazir arasında telefon danışıqları ilə bağlı elan edilən altıncı mesajdır.
