“Almaniya bir neçə ay ərzində nüvə silahı əldə etmək üçün lazım olan hər şeyə malikdir”.
“Füyuzat”ın məlumatına görə, bu qiymətləndirməni MAQATE-nin baş direktoru Rafael Qrossi Polşanın “Rzeczpospolita” qəzetinə müsahibəsində edib.
“Almaniyaya nüvə silahı yaratmaq üçün çox az vaxt lazım olacaq. Bu, aylar məsələsi ola bilər. Almanların bunun üçün lazım olan nüvə materialı var, bunu necə edəcəklərini də bilirlər. Onların ixtiyarında bütün lazımi texnologiyalar var”, – Qrossi jurnalistin müvafiq sualına cavab verib. Eyni zamanda o, bunların yalnız “hipotetik fərziyyələr” olduğunu vurğulayıb.
MAQATE rəhbəri onu da qeyd edib ki, Nüvə Silahlarının Yayılmaması Müqaviləsi şərtlərinə əməl olunması Avropa ölkələrinin maraqlarına cavab verir: “Beynəlxalq münasibətlərdə heç bir dövlət, xüsusən də güclü dövlət altruizmi rəhbər tutmur. O, öz maraqlarından çıxış edir. Avropa ölkələri belə nəticəyə gəliblər ki, hər kəsin nüvə silahına sahib ola biləcəyi dünya fəlakətə gətirib çıxaracaq”.
İyun ayında Bundestaqdakı (parlament) Xristian Demokratik və Xristian Sosial Birliyi (CDU/CSU) fraksiyasının sədri Yens Spahn bildirmişdi ki, Almaniyada yerləşdirilən Amerika nüvə silahları Rusiyanı məhdudlaşdırmaq üçün kifayət etmir və buna görə də, Almaniya və ya Aİ Fransanın və ya Böyük Britaniyanın nüvə arsenalına çıxış əldə etməlidir.
