Rusiyanın Baş naziri Mixail Mişustin İrəvana işgüzar səfərə gedib, burada çərşənbə axşamı Avrasiya Hökumətlərarası Şurasının iclasında və Avrasiya İqtisadi Forumunun plenar iclasında iştirak edəcək.
“Füyuzat”ın məlumatına görə, bu barədə “RİA Novosti” məlumat yayıb.
Çərşənbə axşamı Hökumətlərarası Şuranın iclası zamanı Rusiya, Ermənistan, Belarus, Qazaxıstan və Qırğızıstanın hökumət başçıları Avrasiya İqtisadi İttifaqı çərçivəsində inteqrasiyanın dərinləşdirilməsinin cari məsələlərini müzakirə edəcəklər. Daxili bazarın fəaliyyətinə, sənaye, nəqliyyat, gömrük-tarif, kənd təsərrüfatı və energetika sahələrində qarşılıqlı əlaqənin inkişafına xüsusi diqqət yetiriləcək.
Bundan əlavə, hökumət başçıları 2030-cu ilə qədər Avrasiya İqtisadi İttifaqı çərçivəsində sənaye əməkdaşlığının əsas istiqamətlərini nəzərdən keçirəcəklər.
İclasda Birliyə müşahidəçi dövlətlərin və dəvət olunmuş qonaqların iştirakı da gözlənilir.
Hökumətlərarası şuranın qarşıdan gələn iclası Avrasiya İqtisadi İttifaqının fəaliyyətə başlamasından bəri sayca 40-cı, 2024-cü ildə isə üçüncü iclası olacaq.
