“Pence-Kilit” əməliyyatı bölgəsində separatçı terror təşkilatı üzvlərinin istifadə etdiyi mağarada aparılan axtarış və yoxlama əməliyyatı zamanı metan qazının təsirinə məruz qalaraq şəhid olan türk əsgərlərinin sayı 12-yə yüksəlib.
“Füyuzat”ın məlumatına görə, bu barədə Türkiyə Milli Müdafiə Nazirliyi məlumat yayıb.
“6 iyul 2025-ci il tarixində “Pence-Kilit” əməliyyatı bölgəsində 852-ci təpədə separatçı terror təşkilatı üzvlərinin istifadə etdiyi mağarada aparılan axtarış və yoxlama əməliyyatında metan qazının təsirinə məruz qalan daha 4 qəhrəman silahdaşımız şəhid olub, şəhid şəxsi heyətin sayı 12-yə yüksəlib.
Milli müdafiə naziri Yaşar Gülər yoxlamalar aparmaq və şəhidlərimizin vida mərasimlərində iştirak etmək üçün Türkiyə Silahlı Qüvvələri komandanlığı ilə bölgəyə gedib. Bizi dərindən kədərləndirən bu hadisədə həyatını itirən əziz şəhidlərimizə Allahdan rəhmət, kədərli ailələrinə, Türkiyə Silahlı Qüvvələrinə və soylu millətimizə başsağlığı və səbr, yaralananlara isə tezliklə şəfa diləyirik”, – açıqlamada qeyd edilib.
