“Ədalətli sülhə gedən yol iyunda başlaya bilər”.
“Füyuzat”ın məlumatına görə, bunu Ukrayna prezidenti Volodimir Zelenski iyunda İsveçrədə keçirilməsi planlaşdırılan Sülh Sammiti ilə bağlı açıqlamasında bildirib.
O, iyunun 15-də İsveçrədə keçirilməsi planlaşdırılan Sülh Sammitinə hazırlaşdıqlarını vurğulayıb: “Sülh Sammitinə hazırlıqları davam etdiririk. Komandamız əsas tərəfdaşlarımızın komandaları ilə birlikdə zirvənin həqiqətən qlobal olmasını təmin edəcək. Əmin ola bilərik ki, sammitdə bütün qitələr, dünyanın müxtəlif yerləri və qlobal inkişafa müxtəlif baxışlar təmsil olunacaq. Dünya əksəriyyət olub Rusiyanı sülhə məcbur etməlidir və edə bilər. Ədalətli sülhə gedən yol iyun ayında başlaya bilər”, – Zelenski qeyd edib.
Ukraynanın bu həftə bir çox beynəlxalq görüşlər keçirəcəyini bildirən Zelenski əlavə edib: “Bu həftə həm ictimai, həm də ictimai olmayan bir çox beynəlxalq kommunikasiyalar olacaq. Biz xatırlayırıq ki, bu il siyasi baxımdan bizə nə gətirməli idi, xüsusən də Avropa İttifaqı (Aİ) ilə əldə olunan nəticə vacibdir. Ukrayna üzvlüklə bağlı danışıqlara faktiki başlamaq üçün bütün lazımi şərtləri yerinə yetirib və indi öz öhdəliklərini yerinə yetirmək Aİ tərəfinin öhdəsindədir”, – o deyib.
